கல்விஞானமும், நிறைவான ஞாபக சக்தியும், நல் ஒழுக்க சிந்தனைகளும், எதிர்கால உயரிய வாழ்விற்கு வழி அமைத்துத் தரும் தேவியாக இந்த ஞான தேவி விளங்குவதால் கல்வி பயிலும் மாணாக்கர்களுக்கும்,நல்ல உறுதுணையாக விளங்குகிறார். இவரின் ஆசி பெறுவதற்கு காலை 10 மணிக்குள்ளும், மாலை 5 மணிக்கு மேலும், தியான மண்டபம் வந்து, சுத்தமான துண்டு அல்லது தர்பை பாய் விரித்து, அதன் மேல் பத்மாசனம் அல்லது சாதாரணமாக சுகாசனத்தில், முதுகும், கழுத்தும் வளையாமல் நேராக அமர்ந்து 20 நிமிடம் தமக்குரிய கலையை வேண்டி தியானிக்க வேண்டும்.

இவ்வாறு தொடர்ந்து தியானிப்பதின் மூலம் எல்லா வித்தைகளும் எளிதாக, உள் மனதில் தோன்றி, திறமைகள் வெளிப்படும். இல்வாழ்விலும், பொது வாழ்விலும், மிகச்சிறப்பான தகுதி பெற்று பிரகாசமாக வாழலாம்.

அருள்ஞானம் வேண்டுவோருக்கும் ஞானதேவியின் அருளால் பல யோக நிலைகளும், சாஸ்திரங்களும், ஞானமும், மந்திரங்களும், யோக நிலையில், உள் ஞான ஒளிர்வில் உதிக்கக் காணலாம். இவர்களின் மிக உன்னதமான ஆன்மீக சாதனைகள் பழகி, மிக உயரிய நிலைகளை அடையலாம்.